ໂດຍອີງໃສ່ສະພາບອາກາດໃນປັດຈຸບັນ ໄດ້ເກີດມີຝົນຕົກໜັກຫລາຍມື້ຕິດຕໍ່ກັນເຮັດໃຫ້ນໍ້າໄຫຼຊຸ ແລະ ຖ້ວມຂັງເສັ້ນທາງຫຼາຍຈຸດ ລະຫວ່າງບ້ານ ໃຫຍ່ນາຈະເລີນ ຫາ ບ້ານ ກົ້ວ ທີ່ຂື້ນກັບ ຈຸບ້ານທີ 5 ເມືອງສັງທອງ ນະຄອນຫຼວງວຽງຈັນ. ເຮັດໃຫ້ເສັ້ນທາງຢູ່ເຂດດັ່ງກ່າວ ເກີດມີການເປ່ເພ່ໃນຫລາຍຈຸດສ້າງຄວາມຫຍຸ້ງຍາກລໍາບາກ ໃນການສັນຈອນໄປມາຂອງພໍ່ແມ່ປະຊາຊົນ.
ສະນັ້ນ, ໃນວັນທີ 17 ກໍລະກົດ 2024 ທ່ານ ຄໍາສວຍ ອຸ່ນດາລາ ຮອງເລຂາພັກເມືອງ, ຜູ້ຊີ້ນໍາຈຸບ້ານ ພ້ອມດ້ວຍພະນັກງານກໍ່ສ້າງຮາກຖານ ແລະ ອົງການປົກຄອງບ້ານ 6 ບ້ານ ທີ່ຂຶ້ນກັບຈຸບ້ານທີ 5 ໄດ້ລະດົມທຶນ ແລະນໍາພາການກໍ່ສ້າງສ້ອມແປງ ເພື່ອສ້າງຄວາມສະດວກສະບາຍໃນການໄປມາ ຂອງພໍ່ແມ່ປະຊາຊົນ. ການກໍ່ສ້າງສ້ອມແປງເສັ້ນທາງດັ່ງກ່າວແມ່ນໄດ້ຮັບການສະໜັບສະໝູນທຶນ ຈາກທ່ານ ສົມໃຈ ສີລາຊາ ປະທານບໍລິສັດລາວພັດທະນາຂຸດຄົ້ນຖ່ານຫີນ ຈໍາກັດຜູ້ດຽວ ລວມມູນຄ່າ 34 ລ້ານກວ່າກີບ.
September 28, 2024 - ໂດຍ ຜູ້ດູແລ